Monday, May 21, 2007

حبة رغي

الواحد قاعد مش لاقي حاجة يعملها

و الامتحانات قربت بقا وانتوا عارفين لازم الواحد يخترع حاجة يضيع فيها وقته غير المزاكرة

و انا عامل البلوج من زماااااااان و مش عارف اكتب ايه

قولت ادخل ارغي عن نفسي حبة ( ايه البلوج بتاعي لازم اول حاجة طبعا اتكلم عن نفسي امال هو معمول ليه )

الحكاية تبتدي في يوم رائع من اروع ايام التاريخ (مش كفاية اني جيت فيه ) اليوم ده يوافق 19 من شهر 5 في السنة العظيمة 1986

المكان اروع مكان على وجه الارض ( و المرادي مش عشان انا اتولدت فيه ) مكة المكرمة

الاجواء مشحونة و كله مترقب

و يجي الدكتور و يلقي القنبلة

مبروك ولد ............................................

حد ناصح يسال طب ايه القنبلة في الموضوع

اقوله شطور مصحصح معايا

ببساطة اصل كان نفسهم في بنت

حتى وصل الموضوع ان عماتي في مصر لما عرفوا عيطوا !!!!!

بس معلينا مش القضية

جدتي ربنا يطول في عمرها و يبارك لها في صحتها هي اللي سمتني (سمتني مش سممتني )و اطلقت عليا اسم الدلع اتووس (بفتح الالف و الشدة على التاء ) (كنت بكرهه زمان على فكرة سبحان مغير الاحوال )

و في اليوم ده بدات رحلة العذاب

طبعا منعاً للملل اللي اكيد بقيتوا فيه (و اكيد مش هفتكر كويس وانا بابي ) هنجري في الزمن حبة اللي هو البعد الرابع حسب كلام اينشتين و حسب كلامه بقا ممكن نتحرك فيه

اللي مش مصدق يروح يساله

جهزوا نفسكم و شوز الجري و الترنج عشان هنجري كتير

.
.
.
.
.
اخيرا وصلنا حبة مية بقا عشان تعبت

بس وصلنا فين ؟؟؟

سؤال وجيه استنوا ابص كده

اه افتكرت احنا حاليا في اسكندرية سنة 1992 ( بعد الزلزال باسبوع)

اخيرا نزلنا من السعودية (المفروض نهائي ) و جه وقتي ابدا رحلة العذاب الابدية الا وهي الدراسة

طبعا بابا حب يبعد عن الزحمة فاشترك مع عمتي في فيلا في منطقة تدعى ابوتلات

و اقرب مدرسة ابتدائي هي مدرسة العوامي الابتدائية المشتركة (اجاركم الله )

و طبعا لقدراتي الفوق الطبيعية و ذكائي الخارق (بالنسبالهم طبعا ) كان لازم اكون اشطر واحد هناك و السبب بسيط اني كنت بنسى اي حاجة بتتشرح و ماما كانت بتزاكرلي في البيت

بس على فكرة محدش يفهمني غلط انا عمري مطلعت الاول في اي حتة حتى لو كنت اشطر واحد باعتراف الناس

مرحلة ابتدائي كانت هادية و رتيبة مفهاش غير خنقتي من البدو اللي كنت معاهم و مشاكل البيت و عقدة الصغير و الكلام ده

بس تفجر فيها حبي للقراءة و تراوحت الكتب من ميكي و بطوط لرجل المستحيل و ختاما لرافت الهجان و الفرسان الثلاثة ( مش عارف عيل ايه اللي يقرا الحاجات دي ) حتى بنك المعلومات معداش من تحت ايدي

طبعا النتيجة متوقعة و للي لسه متوقعش النتيجة هي نضارة و انا في 5 ابتدائي بتاخير سنة عن ضعف النظر الفعلي

طبعا فيه شوية احداث متفرقة زي مسابقات الشطرنج بما ان بابا محترف قديم و زي البينج بونج اللي مكنتش بلعبه كتير عشان كنت صغير و اخواتي مش بيحبوا يلعبوا معايا و الانعزال و ادمان القراءة و التليفزيون و احلام اليقظة و الخ الخ الخ

عدي ابتدائي الحمد لله ( خلصتكم اوام اوام اهو ) و دخلت على اعدادي بس مش هتكلم عنها عشان مقعدتش في مصر بعدها غير شهر و توجهت مرة اخرى الي السعودية و لكن للاسف مش مكة المرادي

بس كفاية عليكم كده المرادي اكملكم مرة تانية

اصلي تعبت من الكتابة بعيد عنكم

استنوا لما ازهق تاني و اجيلكم بقا